“Илһам чишмәсе” җиңүчеләре ачыкланды

"Сарман: иң яңа хәбәрләр", 20 август 2019 - 11:06

1515

Сарман балалар сәнгать мәктәбенә татар халкының бөек җырчысы, якташыбыз – Татарстанның һәм Россиянең халык җырчысы Илһам Шакиров исеме бирелү уңаеннан, 7-16 яшьлек балалар арасында “Илһам чишмәсе” дигән районкүләм җыр бәйгесе игълан ителгән иде.

19 август көнне район үзәгендәге Ял паркында I “Илһам чишмәсе” җыр бәйгесенең сайлап алу туры үткәрелде. Урыннар түбәндәгечә булды. 7-10 яшьлекләр арасында I урын билгеләнмәде. II урында исә – Азамат Исламов (Иске Әлмәт), III урында – Рәзилә Бәдретдинова (Колмәт) һәм Ләшәү Тамактан Алия Гәрәева. Икенче төркемдә, ягъни 11-12 яшьлекләр арасында I урынга - Мортамак кызы Рәмилә Хөсәенова, III урынга Иске Кәшердән Эвелина Кашапова лаек булды. Өченче төркемдә – 13-16 яшьлекләр арасында Рания Зарипова (Сарман) һәм Илгиз Сәетов (Сөлек) I урынны яуладылар. Калган урыннар билгеләнмәде.
Әлеге балалар 30 августта үткәреләчәк Илһам Шакиров бюстын ачу тантанасында катнашачаклар.
Конкурс турында тулырак материалны газетабызның чираттагы санында укый аласыз.
Зөлфия Шәрипова язмасы һәм фотолары