Гарифә апа 90 яшен тутырды +ВИДЕО

Олуг юбилее белән ветеранны район Советы аппараты җитәкчесе Юлия Исмәгыйлова тәбрикләде, изге теләкләр белән, Рәсәй Президенты Владимир Путинның Котлау открыткасын, район башлыгы Фәрит Хөснуллин исеменнән истәлек бүләге, чәчәк бәйләме тапшырды. “Шәфкать” үзәге директоры Гөлнара Хуҗина, авыл җирлеге башлыгы Илшат Һадиуллин, аның урынбасары Гөлия Афанасьева, авыл ветераннар советы рәисе Зөлфия Туктарова да юбилярга сәламәтлек, ныклык, бәрәкәтле гомер теләделәр.
- Эшләргә кирәк, кешене эш яшәтә. “Ялкау ятыр, бәхете артыр”, дигән сүз дөрес түгел. Эшләгән кеше бәхетле була. Хәрәкәттә – бәрәкәт, - диде Гарифә апа.
Гомер буе колхозда хезмәт куйган, сыер савучы булып эшләгән ветеран бүгенге көндә дә тик утырырга яратмый. Без килгәндә дә, биленә алъяпкычы бәйләнгән иде. Миңа шулай уңайлы, ди ул.
Юбиляр турындагы тулырак язманы газетабызның алдагы саннарында укыгыз.
Альбина Сабирова язмасы, фотолары һәм видеолары.