Фәрит Хөснуллин Карашай Саклауда Асылмәрдановлар гаиләсенә сертификат тапшырды

Инвалидлар ункөнлеге кысаларында муниципаль район башлыгы Фәрит Хөснуллин Карашай Саклау авылында яшәүче Асылмәрдановлар гаиләсендә булды. Гаилә башлыгы - 3 төркем инвалид Радик Рәшит улы "Нөркәй" агрофирмасында терлекче булып хезмәт куя. Тормыш иптәше Миләүшә белән 3 бала тәрбиялиләр. Олы уллары Илнар, армия сафларында хәрби бурычын үтәп кайткан, балта остасы булып эшли. Кечкенәләре - икесе дә 2 нче төркем инвалидлар. Риназ - 7 нче сыйныфта, Нияз өченчедә укыйлар. "Укытучылар бик ярдәм итә, мәгариф бүлеге җитәкчесе Зөлфия Гыйләҗевага зур рәхмәт", - ди әни кеше. Ул үзе дә, сәламәтлеге какшау сәбәпле, өйдә - хуҗабикә. Ләкин тормыш күрсәткән сынауларга бирешми яши тырыш гаилә. Матур итеп, үз көчләре белән, яңа йорт салып кергәннәр. Күп итеп мал-туарын асрыйлар. Әлбәттә, ныклы ярдәм күрсәтүче, зур терәк булып яшәүче каенатасы Рәшит абый һәм каенанасы Мөгаллимә апага олы рәхмәтле Миләүшә ханым.

Фәрит Мөнәвирович гаиләгә тормыш-көнкүреш техникасы алыр өчен биш меңлек сертификат тапшырды. Бу бүләк - район Советы һәм Башкарма комитет үзешчәннәренең хәйрия концертыннан кергән акчалар фондыннан. Балалар район башлыгы алып килгән тәмле күчтәнәчләрне дә сөенеп кабул иттеләр.