Әфганчылар хәтер яңартты

Быел Әфганстаннан соңгы гаскәр чыгарылуга - 29 ел. Һәр елдагыча быел да 15 февраль көнне Әфган сугышы ветераннары хәтер яңартты. Алар яу кырында ятып калган җиде егетебезнең каберләрендә булып, чәчәкләр салдылар. Аннан соң очрашу ял паркындагы мемориаль комплекста дәвам итте. Анда митинг булды. Ветераннарны район башлыгы Фәрит Хөснуллин котлады. Сарман һәм Мөслим районнары хәрби комиссариатының гражданнарны хәрби хезмәткә әзерләү һәм чакыру бүлеге җитәкчесе Ленар Һадиуллин чыгышыннан соң, шәһит киткәннәр бер минут тынлык белән искә алынды. Әфган сугышында һәлак булганнарның исем-фамилияләре язылган стеллага канәфер чәчәкләре, веноклар салынды. Очрашу сәнгать мәктәбе ашханәседә сый-нигъмәт тулы табын артында дәвам итте.