Чукмарлы өлкәннәре аяк бәйләп йөгерделәр

Быел Өлкәннәр көне Чукмарлы авыл җирлегендә аеруча үзенчәлекле үтте. Безнең авылда туып үскән, хәзерге вакытта район үзәгендәге балалар спорт мәктәбендә тренер булып эшләүче кызларыбыз Диләрә Шәрипова һәм Лилия Хаҗиева өлкәннәргә зур бүләк ясадылар.

Мәдәният йорты директоры Светлана Мөхәммәтшина һәм китапханәче Альмира Нәбиева белән берлектә кече Сабантуй оештырдылар. Бәйрәм барлык өлкәннәр катнашында физик күнегүләр ясау белән башланып китте. Алар капчык киеп, кашыкка йомырка салып, аяк бәйләп йөгерү, капчык эченнән чыгу, скакалкада сикерү һәм башка уеннарда актив катнаштылар, җыр-биюдә дә сынатмадылар. Диләрә белән Лилия аларга бүләкләр дә тапшырдылар. Соңыннан өлкәннәрне мул итеп әзерләнгән табын көтә иде. Алар өстәл әзерләгән, кайнар коймак пешергән кызларга зур рәхмәтләрен белдереп, күтәренке кәеф белән таралыштылар.

Икенче көнне бәйрәм “Сәлам сезгә безнең буыннан” дигән исем астында шулай ук мул табын артында дәвам итте. Авыл җирлеге башлыгы Илшат Һадиуллин өлкәннәрне бәйрәм белән котлап, район хәлләре, җирлектә башкарылган эшләр, алда торган бурычлар белән таныштырды, өлкәннәрне кызыксындырган сорауларга җаваплар бирде, аларга сәламәтлек, бәхетле картлык теләде.

Авыл ветераннар советы рәисе Зөлфия Туктарова өлкәннәр тормышына тукталды, матур теләкләрен җиткерде. Хәзрәтебез Зәкария Хәйруллин вәгазь сөйләде, Коръән укыды. Барыбызга да хәерле гомер теләп һәм әрвахлар рухына дога кылдык.

Очрашу авыл җирлеге хезмәткәрләре көче белән әзерләнгән концерт номерлары белән аралаштырып алып барылды. Китапханәче Альмира Нәбиеваның очрашуны матур итеп алып баруы бәйрәмне тагы да күңеллерәк итте. Барыбыз да авыл җирлегендә хезмәт куючыларга, Диләрә белән Лилиягә рәхмәтле калдык. Аларның үзләренә дә сәламәтлек һәм хезмәтләрендә уңышлар телибез.

Фәһимә Мөхәммәтшина, Чукмарлы авылы

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов:
  • 13 апрель 2021 - 09:54
    Башкортстан кызы Лилия Шагалеева туган телендә Газиз Әбделмәновның шигырен укый!
  • 25 март 2021 - 14:07
    Фирдүс Тямаев Сарайлы авылына кабат кайтачак
  • Сез чүп-чарны сортларга бүләсезме? .
    8 кеше тавыш бирде
  • Сарманда “Нәүрүз” гөрләде
  • Әзһәр аганың яңа китабы тәкъдир ителде
  • Мор өстендә картингчылар ярыша
  • Сарманда ярминкә гөрләде
  • Автомобиль йөртүче әбиләр һәм бабайлар ярыштылар
  • 9 май. Сарманда ветераннарны котлау
  • "Әниләр һәм бәбиләр” Сарман сәхнәсен гөрләтте
  • Сарманда креатив чаналар фестивале үтте
  • Реконструкциядән соң Россия Эчке эшләр министрлыгының Сарман районы буенча бүлеге бинасы ачылды
  • Районда Уңыш бәйрәме узды.