Бүген - вазелинның туган көне

Көнкүрештә аны кулланмаган кеше бармы икән? Безнең һәркайсыбыз аның белән балачактан ук таныш. Киселгән, тырналган, пешкән урыннарга, тире кипшергәндә бик шифалы ул. Ә моннан 138 ел элек аңа башта сагаебрак караганнар. Чөнки ул нефтьтән ясалган. Аны уйлап табучы һәм камилләштерүче Англия-Америка химигы Роберт Чезбро нефтьчеләрнең яраларга желе сыман сәер матдә сөртүләренә игътибар итә. Соңыннан ул аны тикшереп, файдалы компонентларын аерып ала. Шулай итеп, вазелин барлыкка килә. Шунысын да әйтергә кирәк: вазелин табигый һәм ясалма була, ләкин алар арасында әллә ни аерма юк, диләр белгечләр. Алар икесе дә – исе, төсе һәм тәме булмаган ботка сыман масса, әмма кулланучылар аның табигый вариантына өстенлек бирәләр.