“Бензинга бәя арту – мөмкин хәл”. Машинага нинди ягулык салабыз?
Республикада ел саен 2 миллион тоннадан артык мотор ягулыгы сарыф ителә. Ә менә сыйфат тикшерүен барлык ягулык станцияләре дә узмаган. Татарстанда ягулык-энергетика ресурсларын рациональ куллану һәм аларның сыйфатын тәэмин итү буенча идарә башлыгы Роберт Гыйләҗев беренче яртыеллыкның йомгаклау утырышында әнә шулар хакында сөйләде. Ягулыкка бәя ничек булыр?
Бензинны тиешле күләмдә салып бетермәгән, сыйфатсыз ягулык белән очрашкан автомобиль хуҗаларының мөрәҗәгатьләрен кире какмыйлар, ягулык салу урыннарына тикшерүләр җибәрәләр. Республиканың билгеле бер ягулык компаниясенә карата 11 шикаять килгәнлеген дә яшермәде Роберт Гыйләҗев. “Без куркытмыйбыз, ә бары тик ничек эшләргә дөрес юнәлеш кенә бирәбез. Кабат тикшерү узды, дигән сүзләр белән килешеп бетмим. Киңәшләр биргәннән соң, үзгәрешләр бармы, шуны карыйбыз”, – ди ул.
Бензин бәясе артырмы дигән сорау һәр машина йөртүчене борчыйдыр. Ил буенча карасаң, бездәге ягулык бәясе иң арзаннар рәтендә икән.
– Бензин бәясенең түбәнәюе дә, 1-1,5 сумга кискен артуы да көтелми. Әмма билгеле бер күләмдә бәя арту – мөмкин хәл, – диде Роберт Гыйләҗев. Аныңча, мондый очрак була калса да, бу арту барлык ягулык салу станцияләрендә берьюлы күзәтелмәячәк. Шуңа күрә машинаны кайда “ашату” мәсьәләсе хуҗасы ихтыярында калачак.
Чыганак: https://vatantat.ru/
Фото:https://pixabay.com/ru/
Следите за самым важным и интересным в Telegram-каналеТатмедиа
Нет комментариев