Район автомобильчеләре бәйрәм иттеләр

"Сарман: иң яңа хәбәрләр", 1 ноябрь 2018 - 14:40

1367

28 октябрь – автомобильчеләр көне. Шул уңайдан районның “Хуҗалык тәэминаты” унитар предприятиесе хезмәткәрләре үзләренең һөнәри бәйрәмнәрен билгеләп үттеләр.

Аларны район Башкарма комитеты җитәкчесе Әлфис Мөхәммәтгәрәев тәбрикләде. Ул район башлыгы Фәрит Хөснуллин исеменнән теләкләрен җиткереп, Ләззәт Мәүләвиевка, Илшат Мәрдановка, Ринат Даутовка район башлыгының Рәхмәт хатлары тапшырды. Үзара хезмәттәшлек өчен рәхмәт белдереп, мәгариф бүлеге җитәкчесе урынбасары Газинур Габидуллин мәктәп автобусларын идарә итүче йөртүчеләр Роберт Шәймәрдановны, Илдар Борһановны, Шамил Зыятдиновны Мактау грамоталары белән бүләкләде. Унитар предприятие директоры Рамил Ризатдинов та иң изге теләкләрен җиткерде. Бәйрәм мул табын артында уен-көлке, җыр-биюләр белән күңелле үтте.
Юлларыгыз имин, хәвеф-хәтәрсез булсын, хөрмәтле йөртүчеләр.