“Сандугач” балалар бакчасында “Бала – төп пассажир” дип исемләнгән акция уздырылды

Аның максаты – кечкенә пассажирлар катнашындагы юл травматизмы проблемаларын хәл итү, балаларның тормышын һәм сәламәтлекләрен саклау. “Сандугач”та тәрбияләнүчеләр әти-әниләренә үзләрен бары тик автокреслоларда һәм куркынычсызлык каешларын эләктереп кенә йөртү кирәклеге турында искәрттеләр, мәгълүмат буклетлары тараттылар.
Акция кысаларында “Минем балам – төп пассажир” дип исемләнгән фотолар конкурсына нәтиҗә дә ясалды. Аңа килгән барлык фотолардан стенд ясалган иде. Балаларны һәм әти-әниләрне ЮХИДИ идарәсенең район бүлекчәсе инспекторы Айдар Хөснетдинов һәм “Юл хәрәкәте иминлеге “ учреждениесенең Сарман районындагы бүлекчәсе начальнигы Алсу Ситдыйкова, балаларны һәм әти-әниләрне сәламләп, аларның юлларда имин йөрүләрен теләделәр. Конкурста катнашкан һәркемгә “Юл хәрәкәте иминлеге” учреждениесенең истәлек бүләкләре тапшырылды. Акция флешмоб белән төгәлләнде.