Район укучылары янгынчылар булырга әзерләнәләр

Эш барышында укучыларга янгын куркынычсызлыгы таләпләрен үтәү, шул исәптән көнкүрештә, гадәттән тыш хәлләр вакытында хәрәкәт итү турында аңлатылды. Янгын күзәтүе хезмәткәрләре белән берлектә чарада Иваново шәһәрендә янгын-коткару академиясендә укучы курсант – якташыбыз Айнур Мәүлиев тә катнашты. Укучылар аның чыгышын бик кызыксынып тыңладылар, үзләрен кызыксындырган сорауларын бирделәр. Янгын сүндерүче хезмәте, әлбәттә, җиңелләрдән түгел. Ул, беренче чиратта, кыюлык, ихтыяр көче, җаваплылык кебек сыйфатларга ия булуны таләп итә. Башкаларның тормышын саклап калу бәрабәренә үзеңнең гомереңне куркыныч астына кую белән бәйле. Айнур укырга керү һәм белем алу шартлары, курсантларның тормышы, көнкүреше хакында да сөйләде. Әлеге очрашу яшь буынга профессиягә юнәлеш бирү өчен дә бик уңышлы булды.