Ел геройлары ачыкланды

Безнең «Ел герое»н сайлау буенча сораштыруыбыз 17.00 сәгатьтә төгәлләнде. Райондашларыбыз анда бик актив катнаштылар. Аларга үзләре теләгән, үзләре герой дип санаган кешеләр өчен лайк куярга вакыт җитәрлек булды дип уйлыйбыз, моның өчен аларга дүрт көн вакыт бирелде. Шунысын тагын бер кат искәртеп үтәбез: «Ел герое»на кандидатлар исемлеге 2024 ел дәвамында газетада алар хакында язмалар чыккан кешеләрдән төзелде. Башка елларда без бу исемлеккә унар кешене генә кертә идек, быел «Ел герое» буларак лайк алу мөмкинлегенә күбрәк кеше ия булсын, дип уйладык. Шулай ук төркемдәшләребезгә үзләре теләгән кандидатларны атау һәм исемлеккә керттерү мөмкинлеге дә тудырылды. 
Инде һәркемнең тизрәк «Ел герое» исеменә кемнәрнең лаек булганлыгын беләсе киләдер. Кандидатлар күп булганлыктан, без быел бу мактаулы исемгә лаек дип иң күп лайк җыйган дүрт кешене билгеләдек. Болар – Рөстәм Нәбиуллин, волонтер Альбина Харисова, Яңа Имән авыл җирлеге башлыгы, махсус операция зонасына күп тапкырлар гуманитар йөк илтүдә катнашучы Рөстәм Гәрәев һәм Җәлил поселогыннан унике ятим баланы тәрбиягә алучы Рәкыйга Шәяхмәтова. Исемлеккә исә Рөстәм Нәбиуллинны мәгариф тармагы вәкиле, ел дәвамында иң күп телгә алынучы, үз хезмәтен яратып башкарган һәм балалар яраткан укытучы буларак керттек. «Ел геройлары»н котлыйбыз, иминлек һәм уңышлар телибез. 
Геройлар, дигәннән, безнең барлык кандидатларыбыз да «герой» исеменә лаеклы – тырыш хезмәтләре белән абруй казанган кешеләр. 
Ә инде, алдан өстәмә хәбәр иткәнчә, без, аерым исемлек итеп, батырлыклары алдында тагын бер кат баш ию өчен, узган ел газетабыз битләрендә язмалар бастырылган махсус операциядә катнашучы илебез сакчыларын да керткән идек. Әлбәттә, аларның батырлыгы – берни белән дә тиңләштерерлек түгел һәм ул – мәңгелек. Без – алар алдында мәңге бурычлы. Газетабыз битләрендә алар турында узган елларда бик күп яздык һәм быел да бу традицияне дәвам итәчәкбез. Газетабызны укып барыгыз. 
Без барлык төркемдәшләребезгә зур рәхмәтебезне җиткерәбез, исәнлек-саулык һәм уңышлар телибез.