Хәбәрләр 17 сентябрь

Татарстан Авыл хуҗалыгы һәм азык-төлек министрлыгында урып-җыю эшләренә йомгак ясалды. Игенчеләре­без 1 миллион 500 мең гектар мәйданда бөртекле һәм кузаклы культураларны вакытында җыеп алу өчен зур тырышлык куйды. Министрлыкның матбугат хезмәтеннән алынган мәгъ­лүматларга караганда, аш­лыкның тулаем җыемы алдан фаразлаганнан шактый ким - 3 миллион тоннадан артыграк. Уртача уңыш гектарыннан - 21,2 центнер. Күләме буенча Сарман- иң алдагы районнарнын берсе. Республиканың берничә төбәгендә узган семинар-ки­ңәшмәләрдә сөрү җирләрен 20 сентябрьдән дә соңга калмыйча эшкәртү бурычы куелган иде. Күп хуҗалыклар бу эшнең киләчәк уңыш өчен никадәрле мөһим булуын аң­лап эш итә. Оператив мәгъ­лү­матларга караганда, бүген инде 2 миллион гектардан артык сөрү җирлә­ренең 80 процентка якыны эшкәртелгән. Шуның 200 мең гектары - тирәннән сөрелгән җир­­­ләр.

Татарстанда чөгендер ел­дан-ел күбрәк мәйданнар били. Быел аны республиканың унике районында үстерәләр. Уңышы да сөендерә. Табигать шартлары никадәрле генә катлаулы килмәсен, респуб­ликаның Тукай һәм Зәй районнарында гына түгел, Буа, Апас, Чүпрәле, Сарман һәм Кайбыч кырларында да чө­гендер уңышы белән Россия күләмендә горурланырлык. "Агрокөч Төркем" җәмгы­я­тенә керүче хуҗалыкларда чөгендер уңышы җыю тәүлек буе дәвам итә. Кырдан көн саен 10 мең тонна чөгендер чыгарыла. Нәтиҗәдә 4000 гектардан артык мәйданда чө­гендерне җыеп алырга да өлгергәннәр. Уртача уңыш гектарыннан 310 центнер тәшкил итә. Сарманда - 54 мең,Республика буенча 500 мең тонна татлы тамыр җыеп алынган. Уртача уңыш гектарыннан 300 центнерга якын.

Бүген район Советының утырышлар залында узган чираттагы киңәшмәдә төп игътибар алдагы ягулык чорына әзерлек мәсьәләсенә юнәлтелгән иде. Киңәшмәне район башлыгы Н.Закиров алып барды. Анда мәгариф бүлеге җитәкчесе З.Гыйләҗева, Җәлил җылылык челтәре предприятиясе-"Водоканалсервис" ААҖ филиалы директоры А. Әхмәтгалиев, мәдәният бүлеге җитәкчесе Г.Латыйпова, район үзәк шифаханәсенең баш табибы И.Нуретдинов, Александровка авыл җирлеге башлыгы Р. Хәйруллин чыгышлары да тыңланылды.Ахырда район башлыгы Н. Закиров үз фикерләрен әйтте, алга таба конкрет бурычлар куйды.