Өчөйле Саклауда "Кешелекнең куркыныч проблемасы" дигән тематик кичә үткәрелде

Өчөйле Саклау авыл мәдәният йортында наркомания авыруының асылын ачыклау, әлеге куркыныч чирдән кисәтү, сәламәт яшәү рәвешен формалашлаштыру, начар гадәтләрдән саклану һәм каршы торучанлык сыйфатлары тәрбияләү максатыннан яшьләр өчен китапханә белән берлектә "Кешелекнең куркыныч проблемасы" дигән исемдә тематик кичә үткәрелде. Кичәне Саклаубаш авыл җирлеге башлыгы Әлфис Мөхәммәтгәрәев башлап җибәрде, участок инспекторы Ильмир Мөхәммәдиев, Сарман үзәк хастаханәсе наркология бүлегенең шәфкать туташы Рузалия Сәгъдәтова, Саклаубаш участок хастаханәсе табибы Раушан Мифтахов, Өчөйле Саклау фельдшеры Әнүзә Фәйзуллина катнаштылар. Кичә өчен "Наркомания - кешелекнең дошманы" дигән күргәзмә эшләнде. Соңыннан "Сарман" киноучреждениесе Заһид Мәхмүдинең "Әче балан" әсәре буенча эшләнгән "Җәза" исемле кино күрсәтте.