Укучылар имтиханнарны кайчан бирәчәкләр?

9 сыйныфны быел 395 бала тәмамларга җыена. Коронавируска каршы профилактик чаралар белән бәйле рәвештә, алар быел 4 түгел, 2 имтихан бирәчәкләр – мәҗбүри дип куелган рус теленнән һәм математикадан. Ә 2 сайлап алу фәне төшереп калдырыла. 9 сыйныфларның имтиханнары 9 июньнән башланырга тиеш. Алар имтиханны Сарман урта мәктәбендә һәм Җәлил гимназиясендә бирәчәкләр. Ә 11 сыйныф укучылары (алар быел – 155) имтиханны элеккечә үк мәҗбүри дип куелган рус теле һәм математикадан, моннан тыш, сайлап алу фәннәреннән тапшырачаклар. Алар өчен имтихан тапшыру урыны итеп Җәлил гимназиясе билгеләнгән. Унберенчеләрнең имтиханнары 8 июньдә башлана. Барлык имтиханнар, резерв көннәрен дә исәпкә алып, 11 июльдә тәмамланыр дип көтелә.
Зөлфия Шәрипова язмасы