Морбаш мәктәбе сыйныфташлары очраштылар

Тормыш мәшәкатьләре нәтиҗәсендә барысы да килә алмасалар да, сыйныфташларның күпчелеге сагынылган яшьлекләре белән очрашуга килгәннәр иде. Мул табыннар артында бер-бер артлы уртак хатирәләр яңартылды, яшүсмер, яшьлек еллары искә алынды. Шул арада сыйныфташлар бергәләп биеп алырга да өлгерделәр... Арада ярты гасыр вакыт ятмый да кебек: 1969 елның июнь аенда зур өметләр белән кайсы югары сыйныфка, кайсы олы тормышка, ә кайсы махсус урта уку йортларына атлаган егет һәм кызларның, бүген инде җитмешенче дистәне ваклап килгән сыйныфташларның күзләрендә – шул ук очкыннар, йөзләрендә – шул ук елмаю. Тик менә чәчләрне вакыт җиле аралаган да, хәрәкәтләр бераз салмакланган... Сезне киләчәктә дә матур очрашулар көтсен, хөрмәтле сыйныфташлар! 
Зөлфия Шәрипова язмасы һәм фотосы