Әби белән аның ике яшьлек оныгының мәетен мунчада тапканнар

Башкортстанның Яңавыл районындагы Зайцев авылында бер йорт мунчасында хатын-кыз белән нәни бала мәете табылган. Хәзер Нефтекама шәһәре тикшерүчеләре "саксызлык аркасында үтерү" маддәсе буенча җинаять эшен тикшерә. Бу турыда Россия Тикшерү комитетының Башкортстан буенча Тикшерү идарәсе матбугат хезмәте хәбәр итте.

Тикшерүчеләр ачыклаганча, 16 июнь кичендә 58 яшьлек хатын-кыз һәм аның 2 яшьлек оныгы мунчага кереп китә. Бераздан соң аларның өенә күрше хатыны килә. Өйдә кеше булмагач, ул мунчага барып карый. Шунда әби белән онык мәетен күреп ала.

Әби белән оныкка мунчада ис тигән дип фаразлыйлар. Аларда ис газы белән агулану билгеләре була. 

Тикшерүчеләр вакыйга булган урынны тикшергән. Экспертиза чаралары билгеләнгән. Шулар буенча әби белән оныкның үлеме сәбәпләре ачыкланачак. Хәзерге вакытта шаһитларны сораштыралар, диелә бу хәбәрдә.

Фото: http://surb.sledcom.ru

Бу хакта тулырак: https://intertat.tatar/hewef_heter/bashkortstanda-bi-bel-n-any-ike-yashlek-onygyny-m-eten-munchada-tapkannar/