Хатын-кызларга мал чалырга ярыймы?

автор, 26 август 2020 - 18:58

1192

«Хөрмәтле хатын-кызлар, сез үзегезне саклагыз», - дип киңәш итә хәзрәт.

Казанның «Гаилә» мәчетенең имам-хатыйбы Рөстәм хәзрәт Хәйруллин социаль челтәрләрдәге сәхифәләрендә төрле сорауларга җавап бирә.

Бу юлы ул инстаграмдагы сәхифәсендә хатын-кызларның мал чалуына бәйле фикерен әйтә.

«Юк, җәмәгать, ярамый. Хөрмәтле хатын-кызлар, сез үзегезне саклагыз. Сез бит өйнең йөрәге. Сез бит иң матурлары. Урамда матур итеп йөрмәгез. Анда яулык киегез, озын күлмәк киегез. Ирегез кайтканда иң матуры булыгыз. Ничә яшьтә булсагыз да, ак чәчле абыстай-апа булсагыз да, ирегезне матур итеп киенеп каршы алыгыз. Бу вазифалар ирләргә калсын. Әгәр ирем дә юк, балам да юк дисәгез, безгә мөрәҗәгать итегез. Кирәк икән, без килеп чалып бирәбез. Ләкин, хөрмәтле хатын-кызлар, малны үзегез чалмагыз», — дип аңлата хәзрәт.